Amnesty International-ը պահանջում է ձերբակալել Ջորջ Բուշին

Amnesty International իրավապաշտպան միջազգային կազմակերպությունը դիմել է Կանադայի իշխանություններին` խնդրելով պատասխանատվության կանչել ԱՄՆ նախկին նախագահ Ջորջ Բուշին, որը, ըստ կազմակերպության, խախտել է միջազգային քրեական օրենսդրությունը` մասնակից լինելով մի շարք հանցագործությունների, այդ թվում` կտտանքների:

«Ինտերֆաքսը» տեղեկացնում է, որ կազմակերպության խնդրանքը պայմանավորված է Բուշի` հոկտեմբերի 20-ին Կանադա նախատեսված այցով:

«Քանի որ ԱՄՆ իշխանությունները մինչ օրս նախկին նախագահ Բուշին դատական պատասխանատվության չեն ենթրակել, անհրաժեշտ է միջազգային հանրության միջամտությունը: Եթե Կանադան միջոցներ չձեռնարկի նրա այցի ընթացքում, ապա կխախտի ՄԱԿ-ի կտտանքների դեմ կոնվենցիան եւ քամահրանք կցուցաբերի մարդու հիմնարար իրավունքների նկատմամբ»,- հայտարարել է Amnesty International-ի Հյուսիսային եւ Հարավային Ամերիկաների հարցերով տնօրեն Սյուզան Լին:

Իրավապաշտպանները սեպտեմբերի վերջին կանադական իշխանություններին հուշագիր են ներկայացրել, որում Բուշին պատասխանատվության ենթարկելու ապացույցներն են: «Իրավախախտումները տեղի են ունեցել 2002-2009 թթ. ԿՀՎ-ի գաղտնի ձերբակալություննեի ծրագրի ընթացքում: Այդ խախտումների թվում են կտտանքներ, անմարդկային, արժանապատվությունը նվաստացնող վերաբերմունք, նաեւ բռնի անհետացումներ: Լինելով նախագահ` Ջորջ Բուշը թույլատրել է ԿՀՎ-ի գաղտնի ծրագրով ձերբակալվածների նկատմամբ կիրառել հարցաքննությունների վարման մի շարք ընդլայնված մեթոդներ»,- ասվում է կազմակերպության հայտարարության մեջ:

Ոչ մի մարդ եւ ոչ մի երկիր չեն կարող բարձր լինել միջազգային իրավունքի նորմերից. շեշտում են իրավապաշտպանները: