Amnesty International-ը ԵԽ-ին կոչ է անում հստակ դիրքորոշում հայտնել Ադրբեջանի կապակցությամբ

Amnesty International իրավապաշտպան կազմակերպությունը կոչ է անում Եվրոպայի խորհրդին հստակ դիրքորոշում հայտնել Ադրբեջանում խոսքի ազատության ոտնահարումների կապակցությամբ:

«Շաբաթ օրը ավելի քան 80 խաղաղ ցուցարարների ձերբակալումը, որոնցից 30-ին այնուհետեւ պատժել են, տեղի ունեցավ մի քանի օր անց այն բանից հետո, երբ ԵԽԽՎ-ն չկարողացավ բանաձեւ ընդունել Ադրբեջանում քաղբանտարկյալների մասին: Սա ցուցադրում է, թե որքան լուրջ է իրավիճակը»,- ըստ contact.az-ի` ասել է միջազգային կազմակերպության Եվրոպայի եւ Կենտրոնական Ասիայի հարցերով տնօրեն Ջոն Դալուսենը:

Ադրբեջանի պարտավորությունների կատարման հարցով ԵԽԽՎ համազեկուցողներ Պեդրո Ագրամունտը եւ Ջոզեֆ Դեբոնո Գրեխը, դեմ արտահայտվելով  քաղբանտարկյալների վերաբերյալ` պատգամավոր Քրիստոֆ Շտրասերի բանաձեւին, իրենց վրա են վերցրել պատասխանատվությունը: «Այժմ նրանք պետք է միջամտեն, որպեսզի չեղյալ հայտարարվեն շաբաթօրյա ակցիայի մասնակցության համար բանտարկության եւ տուգանքների վերաբերյալ դատավճիռները»,- նշել է Դալուսենը: