Ճգնաժամի երկրորդ փուլը զարգացած երկրների մեղքն է

Միջազգային տնտեսական ճգնաժամի երկրորդ փուլի մասին են խոսում տնտեսական ոլորտի պատասխանատուներն ու փորձագետները:

«Եթե համեմատում ենք 2008-ին սկսված ճգնաժամը երկրաշարժի հետ, ապա կարող ենք ասել, որ այժմ նկատվում են դրա հետցնցումները, ինչը բնական երեւույթ է»,- այսօր լրագրողների հետ հանդիպման ժամանակ ասաց տնտեսական գիտությունների դոկտոր, պրոֆեսոր, «Այլընտրանք» հետազոտական կենտրոնի ղեկավար Թաթուլ Մանասերյանը:

Նա նշեց, թե զարմանալի կլիներ, եթե համաշխարհային տնտեսությունը միանգամից ոտքի կանգներ ճգնաժամից հետո, հատկապես, որ զարգացած երկրները հիմնականում դասեր չքաղեցին դրանից:

Մասնագետի խոսքերով` հենց այս երկրների անհեռատեսության հետեւանքն է երկրորդ ալիքը: Դրանք տուրք են տալիս արհեստական շատ մեխանիզմների եւ ոչ նպատակային ձեւով են  օգտագործում փոխառված գումարները:   

Եվ, բնականաբար, անցումային շրջանում գտնվող երկրները չեն կարող խույս տալ այս ցնցումներից, սակայն կան նաեւ օրինակներ, որ այդ երկրները կարողանում են օգուտներ քաղել ճգնաժամային վիճակից: Թ. Մանասերյանը բերեց Ղազախստանի եւ  Լեհաստանի օրինակները, որոնք կարողացան, անցած տարվա տվյալներով, գրանցել տնտեսական աճ` համապատասխանաբար 7 եւ 4.4 տոկոս:

«Սրանք օրինակներ են, որոնք փաստում են` զարգացող, անցումային փուլում գտնվող երկրները կարող են հաջողություններ արձանագրել»,- ասաց տնտեսագետը:

Նա հավելեց նաեւ, որ կցանկանար, որ վերջին ութ ամիսներին վերաբերող 3.5 տոկոս տնտեսական աճի ցուցանիշը էպիզոդիկ բնույթ չունենար, նաեւ` որ ՀՀ տնտեսությունն ավելի մեծ աճ արձանագրելու պոտենցիալ ունի: