ՀԱՅԿԱԿԱՆ ԺԱՄԱՆԱԿ. Բան չի փոխվել

ՌԴ վարչապետ Վլադիմիր Պուտինի իրական կարգավիճակը «Եդինայա Ռոսիա» կուսակցության վերջին համագումարից հետո չի փոխվել եւ չի փոխվի նաեւ ՌԴ նախագահի ընտրություններից հետո, երբ Պուտինը կվերընտրվի Ռուսաստանի նախագահ: Այս մասին «ՀԺ» թղթակցի հետ զրույցում ասել է ՀՀ նախագահի նստավայրի մոտ կանգնած մի պաշտոնյա` մեկնաբանելով վերջին օրերին շրջանառվող այն լուրերը, թե Պուտինի վերադարձը Կրեմլ կնպաստի Ռոբերտ Քոչարյանի` ՀՀ վարչապետ դառնալու ծրագրի իրագործմանը:

Նախագահականի պաշտոնյան ասել է, որ նախ` պետք չէ Պուտինի հայաստանյան հնարավորությունները չափազանցնել, եւ հետո` եթե Քոչարյանին պաշտոնի վերադարձնելը Պուտինի համար կարեւոր լիներ, ՌԴ վարչապետը մինչեւ հիմա էլ այդ ուղղությամբ կարող էր քայլեր ձեռնարկել, եւ որեւէ մեկը Ռուսաստանում նրա ջանքերին չէր կարող խոչընդոտել: Պաշտոնյան ասել է նաեւ, որ տվյալ թեմայի շուրջ աժիոտաժը հրահրվում է Քոչարյանի շրջապատի կողմից, եւ Սերժ Սարգսյանի թիմը դա գնահատում է որպես վերջինիս` անգլիական թագուհի դարձնելուն ուղղված դավադրություն: