Կառավարությունը պատասխանի փոխարեն հեքիաթ է գրում

Տրամվայը վերականգնել գրեթե անհնար է, իսկ տրոլեյբուսն էլ հոգեվարքի մեջ է: Եվ եթե քաղաքային տրանսպորտի զարգացման հեռանկարը, ըստ ղեկավարության, միայն ավտոբուսների ու միկրոավտոբուսների քանակի շատացումն է, ապա դա աղետալի է: Տրանսպորտային այդ տեսակներն աղտոտում են օդային ավազանը, նաեւ երթեւկության անհարմարություններն են ավելացնում:

Այսօր լրագրողների հետ հանդիպման ժամանակ «Սպառողների միություն» ՀԿ-ի նախագահ Արմեն Պողոսյանը նշեց, որ պետք է տրանսպորտի զարգացման համար նախընտրել ամբողջ աշխարհում կիրառվող քաղաքակիրթ ձեւը: Ընդ որում` խոսքը ոչ միայն եվրոպական զարգացած, այլեւ աֆրիկյան ու ասիական երկրների մասին է:

Սպառողների միությունը դեռեւս նախորդ տարվա դեկտեմբերին դիմել է վարչապետին` առաջարկելով քայլեր ձեռնարկել էլեկտրական տրանսպորտի զարգացման ուղղությամբ, դիվերսիֆիկացնել քաղաքային տրանսպորտը: Վարչապետը նամակը փոխանցել էր տրանսպորտի եւ կապի նախարարություն:

«Փոխնախարարի ստորագրությամբ եւ ՀՀ զինանշանով պատասխանը ներկայացվեց մեզ, որը Հարուն ալ Ռաշիդի հեքիաթն էր: Մեզ համար վիրավորական է, երբ,  որպես կոմպետենտ, մարդիկ դիմում ենք եւ հեքիաթային պատասխան  ստանում»,- դժգոհեց Ա. Պողոսյանը: