Nabucco-ն իրականություն կդառնա, բայց ոչ այսօր

Nabucco գազատարը, որը կոչված է նվազեցնելու Եվրամիության կախվածությունը ռուսաստանյան գազից, թեեւ հիասքանչ նախագիծ է, սակայն այսօր չի կարող իրագործվել. Reuters-ին տված հարցազրույցում ասել է հունական DEPA գազային ընկերության ղեկավար Հարրի Սաչինիսը:

«Nabucco-ն լցնելու համար անհրաժեշտ գազի ծավալներ տվյալ պահին չկան»,- ասել է նա` հավելելով, որ հույսերը, թե ադրբեջանական «Ապշերոն» գազային հանքավայրի շահագործումը կլրացնի այդ բացը, նույնպես անհիմն են:

«Եվրահանձնժողովի սեպտեմբերի 12-ի հայտարարությունը, թե ԵՄ-ն համաձայն է միջնորդ դառնալ Թուրքմենստանից գազի մատակարարման բանակցություններում (խոսքը Կասպից ծովի հատակով Տրանսկասպիական գազատար կառուցելու մասին է), նույնպես մոտ ապագայում մատակարարումների երաշխիք չէ»,- ասել է Սաչինիսը` նաեւ վկայակոչելով Կասպից ծովի բաժանման վերաբերյալ վեճերը, ինչը դժվարացնում է Տրանսկասպիական խողովակաշարի կառուցումը: