Nabucco-ն փորձում են շարժել տեղից

Nabucco Gas Pipeline International GmbH-ի եւ հինգ տարանցիկ երկրների (Ավստրիա, Բուլղարիա, Հունգարիա, Ռումինիա, Թուրքիա) միջեւ գազատրանսպորտային նախագծին աջակցելու վերաբերյալ պայմանագիրը ստորագրվելու է հունիսի 8-ին թուրքական Կայսերի քաղաքում: Այդ մասին ասվում է ընկերության հաղորդագրության մեջ:

«Միջկառավարական համաձայնագրին զուգահեռ` դա անհրաժեշտ նախադրյալ է նախագծի հաջող ֆինանսավորման համար»,- ասել է ընկերության կառավարիչ տնօրեն Ռեյնհարդ Միտչեկը:

Համաձայնագրի հիմնական տարրերն են` ԵՄ եւ Թուրքիայի էներգետիկ օրենսդրությանը համապատասխան գազի տարանցման շահավետ նորմատիվային բազայի հաստատում, Nabucco-ի պաշտպանությունը օրենսդրության մեջ հնարավոր խտրական փոփոխություններից, նախագծի հետագա իրականացման համար օրենսդիր եւ վարչական միջոցներին աջակցություն: Բացի այդ` համաձայնագրով պետություններից յուրաքանչյուրը հանձն է առնում աջակցել նախագծին:

3300 կմ երկարությամբ գազատարը աշխարհի գազով հարուստ տարածաշրջանները` Կասպից ծովը, Մերձավոր Արեւելքը եւ Եգիպտոսը կապելու է սպառողական շուկաների` Եվրոպայի եւ Թուրքիայի հետ: Խոշովակաշարի շինարարությունը սկսվելու է 2013-ին, գազի առաջին հոսքը սպասվում է 2017-ին: