ԿԱՊԻՏԱԼ. Nabucco-ի համաձայնագրի կնքման արարողությունը` հունիսի 6-ին

Հունիսի 6-ին Թուրքիայում տեղի կունենա Nabucco գազախողովակաշարի կառուցման մասնակից ընկերությունների կոնսորցիումի միջև համաձայնագրի ստորագրման արարողությունը։ Այս մասին հայտնում են մի շարք զանգվածային լրատվամիջոցներ` վկայակոչելով Թուրքիայի էներգետիկայի նախարար Թաներ Յըլդըզին։

Նախարարը տեղեկացրել է, որ համաձայնագիրը կստորագրեն OMV (Ավստրիա), BOTAS (Թուրքիա), Bulgargaz (Բուլղարիա), Transgaz (Ռումինիա), MOL Natural Gas (Հունգարիա) և RWE (Գերմանիա) ընկերությունները։

Յըլդըզի խոսքով՝ ներկայում համաձայնագրի ստորագրումը խոչընդոտող որևէ հանգամանք գոյություն չունի: Ըստ Յըլդզի` նախագծի հովանավորները մտադիր են ստանալ նաև ադրբեջանական կողմի` նախագծին մասնակցելու առնչությամբ վերջնական համաձայնությունը։

«Եթե Ադրբեջանի պատասխանը բացասական լինի, ապա մենք բանակցություններ կսկսենք Իրանի, Իրաքի, Թուրքմենստանի հետ։ Եվրոպայի համար այդ նախագիծը մեծ նշանակություն ունի, և մենք ժամանակ կորցնելու իրավունք չունենք։ Այդ իսկ պատճառով մենք կօգտագործենք բոլոր տարբերակները՝ Nabucco-ն կյանքի կոչելու համար»,- ասել է նախարարը։

Նշենք, որ Nabucco-ով գազը կասպյան տարածաշրջանից Թուրքիայով պետք է հասցվի Եվրոպա: