Սպանության բացահայտում` 17 տարի անց

Օրեր առաջ Վրաստանի ՆԳՆ հատուկ օպերատիվ վարչության եւ գլխավոր դատախազության հակակոռուպցիոն դեպարտամենտի աշխատակիցներին հաջողվել է բացահայտել Մինասյանների ընտանիքի 3 անդամի` 17 տարվա վաղեմության սպանությունը եւ ձերբակալել 3 հանցագործի, եւս 3-ը հետախուզման մեջ են:

Վրաստանի ՆԳՆ լրատվական ծառայության հաղորդագրության մեջ նշված է, որ գործում ներառված է ազգությամբ վրացի 7 հանցագործ, որոնցից մեկն արդեն մահացել է:

Երկար տարիներ իրականացված հետաքննությամբ պարզվել է, որ հանցագործները 1994-ի հունվարի 18-ին առեւանգել են Վազգեն Մինասյանին, ապա  15 հազար դոլար փրկագինը ստանալուց հետո ազատ արձակել` պայմանով, որ ամբողջական փրկագինը` 150 հազար դոլար, կվճարեն մի քանի օրից: Սակայն փորձելով կոծկել առեւանգման փաստ` հանցագործները որոշել են սպանել Մինասյանների ընտանիքի անդամներին: