Սերժ Սարգսյանը Հայաստանը ճահճի մեջ կթաղի

ԼՂՀ նախկին արտգործնախարար Արման Մելիքյանն այսօր, գնահատելով Հայաստանի երեք նախագահներից յուրաքանչյուրի վերընտրվելու հավանականությունը, Սերժ Սարգսյանի հնարավորությունները ավելի բարձր գնահատեց` պնդելով, որ թե' Ռոբերտ Քոչարյանը, թե' Լեւոն Տեր-Պետրոսյանը կաջակցեն նրան` ընդդեմ մյուս հակառակորդի: «Այսինքն` Ռոբերտ Քոչարյանը կաջակցի Սերժ Սարգսյանին` ընդդեմ Լեւոն Տեր-Պետրոսյանի, վերջինս էլ կաջակցի Սերժ Սարգսյանին` ընդդեմ Ռոբերտ Քոչարյանի»,- ասաց նա` ավելացնելով, որ Սերժ Սարգսյանի պաշտոնավարման դեպքում Հայաստանը կշարունակի թաղվել «ահավոր ճահճի» մեջ` կորցնելով հավատը իշխանության նկատմամբ:

«Տեր-Պետրոսյանի կամ Քոչարյանի իշխանության գալու պարագայում մենք կունենանք իրավիճակի ռադիկալ սրում, որը պայմանավորված կլինի հակառակորդների նկատմամբ որոշակի հետապնդումներով: Եթե գա Տեր-Պետրոսյանը, ապա  անխուսափելի կլինի սեփականության ֆինանսական դաշտի վերաձեւում, եթե գա Քոչարյանը, ապա, կարծում եմ, որ Տեր-Պետրոսյանի կողմնակիցները ակտիվորեն կսկսեն հեռանալ երկրից կամ կանցնեն խուլ ընդհատակ»,- եզրակացրեց Արման Մելիքյանը:

Նա համոզված է, որ առաջիկա ամիսներին  ժողովուրդը պետք է կողմնորոշվի եւ նոր դեմք փնտրի` ազատվելով այդ երեք վատ տարբերակներից: