WikiLeaks. Սերժ Սարգսյանը չի ընդունել ազատագրված տարածքները բնակեցնելու առաջարկը

Ռուսաստանը եղել է Հայաստանի կողմնակիցը, սակայն ներկայումս այն թուրքերի կողմն է. 2010-ի հունվարին ԱՄՆ դեսպան Մարի Յովանովիչի հետ հանդիպման ժամանակ հայտարարել է գործարար Միխայիլ Բաղդասարովը:

Ըստ 2010-ի փետրվարի 17-ով թվագրվող փաստաթղթի` գործարարը լավատեսորեն նշել է, որ թուրքական խորհրդարանը կվավերացնի հայ-թուրքական արձանագրությունները, սակայն հարկավոր չէ սպասել, որ Հայաստանը դա կանի առաջինը:

Բաղդասարովն ավելացրել է, որ Հայաստանի առաջատար գործարարները կողմ են Թուրքիայի հետ սահմանի բացմանը: «Հայաստանը պետք է քայլեր կատարի իր բարի կամքը թուրքերի նկատմամբ ցուցադրելու համար, սակայն նա չի թռչի առանց պարաշյուտի»,- ասել է նա:

Խոսելով հայ-թուրքական հարաբերությունների եւ Ղարաբաղյան հակամարտության մասին, Բաղդասարովն ուղիղ ասել է. «Ռուսաստանը մի ժամանակ ավելի շատ Հայաստանի կողմնակիցն էր, իսկ հիմա թուրքերի կողմն է տնտեսական հարաբերությունների պատճառով»: Երբ դեսպանը նշել է, որ Պուտինը եւ Լավրովը աջակցել են Հայաստանին` հայտարարելով, որ հայ-թուրքական գործընթացի եւ Ղարաբաղյան կարգավորման միջեւ կապ չկա, Բաղդասարովն ասել է. «Դա այն է, ինչ նրանք ասում են հրապարակայնորեն»:

Նա նշել է, որ ներկա պահին սխալ է ճնշում գործադրել նախագահ Սարգսյանի վրա հակամարտության կարգավորման հարցում, քանի որ նա ճնշման տակ է Թուրքիայի հետ հարաբերությունների բարելավման առումով: Գործարարը նաեւ հավելել է, որ Լեւոն Տեր-Պետրոսյանը գահընկեց արվեց այն բանի պատճառով, որ պատրաստ էր զիջումների գնալ ԼՂ հարցում:

Բաղդասարովը կողմ է Լեռնային Ղարաբաղում Հայաստանի ավելի ակտիվ քաղաքականությանը, ներառյալ` ազատագրված տարածքների վերաբնակեցման, «որպեսզի Ադրբեջանին ցույց տանք, որ կորցնելու բան ունի»: Չնայած դրան` նա խոստովանել է, որ նախագահ Սարգսյանը «նույնիսկ չի ցանկանում մտածել դրա մասին»:

Ինչ վերաբերում է ներքին քաղաքականությանը, Բաղդասարովը անվստահաբար է վերաբերվում վարչապետ Տիգրան Սարգսյանի գործունեությանը, նաեւ քննադատել է կառավարությանը, խորհրդարանին, նախագահի վարչակազմին աշխատանքի ցածր արդյունավետության համար: Նա ակնարկել է, որ նախագահի եւ ԱԺ խոսնակ Հովիկ Աբրահամյանի միջեւ մրցակցության կա, սակայն երբ հարցրել են,  թե Քոչարյա՞նն է դա հրահրել, չի պատասխանել, միայն ասել է, որ վերջինս հեռացել է քաղաքականությունից:

Փաստաթղթի մեկնաբանության մեջ նշվում է, որ օլիգարխներից նախագահին ամենամոտ կանգնածը Բաղդասարովն է, համարվում է նրա հավատարիմ ընկերը ե հաճախ է հանդիպում Ս. Սարգսյանի հետ: «Մենք համարում ենք, որ Բաղդասարովի մեկնաբանությունները հաճախ արտացոլում են նախագահի մտածելակերպը կամ այն խնդիրները, որոնք նրանք միասին քննարկել են»,- ասվում է դեսպանի զեկույցում: