Ազատագրված տարածքները պատկանում են Ղարաբաղին` իրենց Սահմանադրության համապատասխան

«Ժառանգություն» կուսակցության փոխնախագահ Արմեն Մարտիրոսյանը մտահոգոված չէ ԵԱՀԿ Մինսկի խմբի ամերիկացի համանախագահ Ջեյմս Ուորլիքի հայտարարությունից, որովհետև Հայաստանի իշխանությունները տարիներ շարունակ համաձայն են եղել և այդ կետերի շուրջ բանակցել են` իրենց իշխանությունը պահպանելու համար:

Yerkir.am-ի հետ զրույցում Արմեն Մարտիրոսյանը նշեց, որ, այդ հարցի հետ կապված, «Ժառանգություն» կուսակցությունն ունի իր հստակ դիրքորոշումը:

«Մեզ համար անընդունելի են Մադրիդյան սկզբունքները, այդ շրջանակներում Ուորլիքի բարձրաձայնած կետերը նույնպես անընդունելի են: Կա ԼՂ անկախության իրավական ամբողջական փաթեթը: ԼՂ-ն անկախացել է ինչպես ԽՍՀՄ Սահմանադրությանը համապատասխան, այնպես էլ` միջազգային բոլոր իրավական ակտերին համապատասխան, ուստի նոր կամաարտահայտության խնդիր չենք տեսնում: ԼՂ-ի անկախությունը իրավական առումով ապահովված է, ունի անկախ պետության բոլոր ինստիտուտները, իսկ ազատագրված տարածքները ԼՂ հողերն են, որոնք Ստալինի կառավարման ժամանակ այնպես արեցին, որ այդ հողերը առանձնացվեցին»,- ասաց Արմեն Մարտիրոսյանը` շեշտելով, որ այդ հողերը հենց հայկական պատկանելություն են ունեցել:

Նրա խոսքով` Ուկրաինայում տեղի ունեցող իրադարձությունները ցույց են տալիս, որ որևէ երկիր որևէ երաշխիք չի կարող տալ, որ իրեն տրված երաշխիքները կաշխատեն: 1994թ. Ուկրաինային միջուկային զենքից հրաժարվելու դիմաց Մեծ Բրիտանիան, Ռուսաստանը և ԱՄՆ-ը խոստացան ոչ միայն  Ուկրաինայի տարածքային ամբողջականության անվտանգությանր, այլ նաև տնտեսական երաշխիքներ, բայց ընդամենը 20 տարի անց, Արմեն Մարտիրոսյանի խոսքով, հենց երաշխիք տվող պետությունը` Ռուսաստանը, Ղրիմը վերցրեց իրեն:

«Սա ցույց է տալիս, որ ներկա ժամանակաշրջանում այդ միջազգային երաշխիքները որևէ դերակատարություն չունեն, հակառակ պարագայում` այդ միջազգային երաշխավորները նախ թող Սևրի պայմանագրով Հայաստանին հասանելիք հողը տան, նոր հետո խոսեն մնացածի մասին»,- ասաց նա:

Մարտիրոսյանը նաև նշեց, որ Ուորլիքի հայտարարության մեջ դրական շեշտադրում էլ կար, դա այն է, որ առաջին անգամ  խոսվում է ԼՂ-ի անկախ սուբյեկտ լինելու մասին` չդիտելով ԼՂ-ն որպես Ադրբեջանի մաս: Եվս մի դրական պահ կա այդ հայտարարության մեջ, որովհետև մի քանի օր առաջ Ադրբեջանում ՌԴ դեսպանը ասել էր, որ ԼՂ-ն միանշանակ Ռուսաստանը Ադրբեջանի կազմի մեջ է տեսնում, և Հայաստանից որևէ հայտարարություն կամ աղմուկ չեղավ, ոչ էլ Ռուսաստանից ետ կանչեցին այդ դեսպանին: Ստացվում է, ըստ Ա. Մարտիրոսյանի, որ ՌԴ  դեսպանն արտահայտել է հենց Ռուսաստանի տեսակետը: Այս առումով Ուորլիքը հայտարարեց, որ ԱՄՆ-ը թույլ չի տա, որ որևէ երկիր փորձի միակողմանի կերպով ստատսու քվո խախտել Ղարաբաղի հարցում:

Իսկ, ըստ նրա, հայտարարության բացասական մասն այն է, որ խոսվում է ազատագրված տարածքների վերադարձի մասին, ինչը ընդունելի չէ, ինչպես նաև խոսվում է փախստականների վերադարձի մասին, երբ հայտնի չէ, թե որ փախստականների մասին է խոսքը` ո՞ր տարածքների փախստականների մասին և ի՞նչ իրավունքներով:

«Ազատագրված տարածքները միանշանակ պատկանում են Ղարաբաղին` իրենց Սահմանադրության համապատասխան: Մի դրույթ էլ կա, որ մտահոգիչ է, դա խաղաղապահների վերաբերյալ կետն է: Երեք կողմերի ջանքերով ստեղծած խաղաղությունը ավելի ընդունելի է, քան խաղաղապահների միջոցով, որը կարող է բերել տարածաշրջանում ուժերի հարաբերակցության խախտման»,- ասաց Արմեն Մարտիրոսյանը: