Արդարությունը վերականգնվեց

Մեր թերթի հունիսի 23-ի համարում անդրադարձել էինք Արաբկիր վարչական տարածքի Կոմիտասի 26 շենքի մի խումբ բնակիչների դժգոհություններին` կապված բիզնեսի հովերով տարվածների նոր կամայականությունների դեմ:

Ինչ-որ մեկը որոշել էր հենց շենքի դիմաց խորովածանոց բացել` մայթի, կանաչ տարածքների, առավել եւս` դեպի Կոմիտասի փողոց բացվող շենքի լուսամուտների ծածկման եւ բնական լույսից զրկելու հաշվին: Շենքի բնակիչների` քաղաքապետարանին ուղարկած 4 դիմումներին ստացվել էր մեկ պատասխան. «Ոչ բնակելի տարածքների վերակառուցման, ընդլայնման եւ կցակառույցի իրականացման շինարարական աշխատանքները կատարվում են շինարարության թույլտվության համաձայն»:

Ուրախ ենք տեղեկացնել, որ Երեւանի քաղաքապետարանը չեղյալ է համարել վերոնշյալ շենքի կցակառույցի շինարարության թույլտվությունը: Մեր` խնդրին անդրադառնալուց մոտավորապես մեկ շաբաթ անց շինարարությունը կանգնեցվել է: Իսկ հուլիսի 12-ին եւ 13-ին քաղաքապետարանի աշխատակիցները հողին են հավասարեցրել կցակառույցը:

Գուցե Երեւանի քաղաքապետն ընդհանրապես տեղյակ չէ քաղաքապետարանի աշխատակազմի քաղաքաշինության եւ հողի վերահսկողության բաժնի պետի՝ բնակիչներին տված պատասխանից, իսկ պատասխանատու չինովնիկը պարզապես գրել է այն, ինչ գրվում է սովորաբար նման դեպքերում:

Իհարկե, որպես հսկող աչք` մամուլը պարտավոր է մշտապես անդրադառնալ նման ապօրինություններին եւ «տեղ» հասցնել քաղաքացիների արդարացի ձայնը: Եվ նույնքան հաճելի է տեղեկանալ, որ քաղաքապետն ուշադիր է հրապարակումներին, եւ եթե բյուրոկրատական ապարատը թույլ չի տալիս քաղաքացու ձայնն առանց միջնորդի հասցնել պաշտոնյային, դա հնարավոր է լինում անել թեկուզ մեր միջոցով: Հույս ունենք, որ այսպիսի գործելակերպը օրինակ կդառնա նաև այլ գերատեսչությունների համար: