ՏԵՍԱՆՅՈՒԹ․ Սևանի ափամերձ տարածքները մաքրելու, շինությունները ապամոնտաժելու ծրագիր է մշակվել․ Ոսկեհատ Գրիգորյան

Շրջակա միջավայրի նախարարությունը գույքագրել է 1901,5 մետրի նիշից ներքև ընկած շինությունները, որոնք պետք է ապամոնտաժվեն՝ ըստ Yerkir.am-ի ասաց Բնության հատուկ պահպանվող տարածքների և կենսաբազմազանության քաղաքականության վարչության պետի ժամանակավոր պաշտոնակատար Ոսկեհատ Գրիգորյանը՝ խոսելով Սևանը «ծաղկումից» փրկելու և էկոհամակարգի հավասարակշռությունը վերականգնելու միջոցառումների մասին։

«Իրականացված աշխատանքներից ուզում եմ առանձնացնել լճի ափամերձ տարածքների մաքրումը։ Հաջորդ խնդիրը, որը կարևոր է Սևան լճի համար, շենքերի և շինությունների ապամոնտաժումն է։ Համայնքապատկան շենք-շինությունները կապամոնտաժվեն պետական միջոցներով։ Մասնավոր շենք-շինությունների սեփականատերերին արդեն իսկ ուղարկվել են համապատասխան ծանուցումներ՝ իրենց պատկանող շինությունները սեփական միջոցներով ապամոնտաժելու համար»,-ասաց նա։

Սևան թափվող կեղտաջրերը մաքրելու համար նախարարությունը նախատեսել է 3 խոշոր աղտոտող համայնքների՝ Գավառի, Մարտունու և Սևանի համար հիմնել կենսաբանական մաքրման կայան։ Այս  պահին առավել խոշոր տնտեսվարողների մոտ տեղադրված է 17 լոկալ մաքրման կայան։

Դեռևս անցած տարի նախարարությունը մշակել է Սևանա լճում ձկան և խեցգետնի պաշարների վերականգնման, մշակման ձևերի և չափսերի կարգը։  Այս տարի, կարևորելով Սևանա լճի առողջացումը, նախարարությունը մշակել է նաև Սևան լճում հատուկ էնդեմիկ ձկնատեսակների լիճ բաց թողնման ծրագիրը։

Ավելի վաղ Yerkir.am-ը տեղեկացրել էր, որ Սևանի «ծաղկման» պատճառը «Հիդրոօդերևութաբանության և մոնիթորինիգի կենտրոնի» տնօրենի տեղակալ Գայանե Շահնազարյանը համարում է էկոհամակարգի հավասարակշռության խախտումը, որը հետևանք է նաև կեղտաջրերի՝ առանց մաքրման բաց թողնելու Սևանա լիճ։

Մանրամասն՝ տեսանյութում․