Ընդունելություն` ՀՀ նախագահի նստավայրում

Նախագահ Սերժ Սարգսյանն այսօր ընդունել է Ուկրաինայի Գերագույն ռադայի նախագահ Վլադիմիր Լիտվինին. տեղեկացնում է ՀՀ նախագահի մամուլի գրասենյակը:

Ողջունելով հյուրին՝ նախագահը նշել է, որ վերջին երկու շաբաթվա ընթացքում արդեն երկրորդ հանդիպումն է Ուկրաինայի Գերագույն ռադայի նախագահի հետ, ինչը վկայում է երկկողմ հարաբերություններն ակտիվացնելու, այն որակապես նոր մակարդակի բարձրացնելու փոխադարձ ցանկության մասին: Նախագահը հույս է հայտնել, որ պարոն Լիտվինի այցը լրացուցիչ խթան կհանդիսանա երկկողմ հարաբերությունների զարգացման և ամրապնդման համար:

Ուկրաինայի Գերագույն ռադայի նախագահը հայաստանյան իր այցի ընթացքում ունեցած հանդիպումները բավական արդյունավետ է համարել` տեղեկացնելով նախագահ Սարգսյանին, որ ՀՀ Ազգային ժողովի ղեկավարության և հանձնաժողովների ղեկավարների հետ պայմանավորվածություն է ձեռք բերվել խորհրդարանների մակարդակով սերտորեն փոխգործակցել նախագահներ Սերժ Սարգսյանի և Վիկտոր Յանուկովիչի միջև ձեռք բերված պայմանավորվածությունները կյանքի կոչելու ուղղությամբ՝ ի շահ երկու երկրների և ժողովուրդների:

Հանդիպման ընթացքում կարևորվել է միջխորհրդարանական բարեկամության խմբերի գործունեությունը, նաև երկու երկրների խորհրդարանականների համագործակցությունը միջազգային տարբեր կազմակերպությունների շրջանակում: