Նախագահի նստավայրում էժան ինտերնետ են ''քաշել''

2014 թ. պետական բյուջեի նախագծում ՀՀ նախագահի աշխատակազմի համար նախատեսված ավելացումները շուրջ 6 տոկոս են կազմում: Այս մասին այսօր Ազգային ժողովում 2014 թ. բյուջեի քննարկման ժամանակ ասաց նախագահի աշխատակազմի ղեկավար Վիգեն Սարգսյանը:

«Ավելացումը հիմանականում գազի, էլեկտրաէներգիայի գների և աշխատավարձերի նոր համակարգի ներդրման հաշվարկով է պայմանավորված»,- պարզաբանեց նա:

Նախագահի աշխատակազմին բյուջեով հատկացվել է 236 միլիոն դրամ: Կապի ծառայությունների գծով նախատեսված է շուրջ 10 միլիոն դրամի նվազեցում, ինչը պայմանավորված է ավելի էժան ինտերնետ կապի ապահովման ծառայություններով: Այլ ծախսերով նույնպես պակասեցում է եղել` 35 միլիոն դրամով, և վարչական օբյեկտների շինարարության մասով`50 միլիոն դրամով:

«Աշխատելու ենք այն ուղղությամբ, որ նախագահի աշխատակազմը հանրության համար ավելի բաց դարձնենք»,- նաեւ խոստացավ նախագահի աշխատակազմի ղեկավարը: