Ջուլիան Ասանժը վախենում է

WikiLeaks-ի հիմնադիր Ջուլիան Ասանժը դադարեցրել է բրիտանական եւ ամերիկյան հրատարակիչների հետ կնքած` 1,6 մլն դոլարի պայմանագիրը, ըստ որի` վերջիններս պետք է նրա ինքնակենսագրությունը հրատարակեին:

Ըստ բրիտանական ԶԼՄ-ների` Ասանժն այդ քայլին է գնացել` մտավախություն ունենալով, որ գրքում շարադրված փաստերը ամերիկյան դատախազության համար լրացուցիչ հնարավորություններ կստեղծեն` իրեն ԱՄՆ-ին հանձնելու: 39-ամյա ավստրալացին համոզված է, որ ԱՄՆ-ում իրեն մահապատժի կենթարկեն:

Էդինբուրգում գտնվող «Քենեգեյթ» հրատարակչության պաշտոնական ներկայացուցիչը հրաժարվել է որեւէ մեկնաբանություն տալ այդ կապակցությամբ: Նա լրագրողներին կոչ է արել սպասել Լոնդոնի բարձրագույն դատարանի որոշմանը, որը հուլիսի 12-ին քննարկելու է Ասանժի բողոքարկումը իրեն Շվեդիային հանձնելու կապակցությամբ:

Շվեդիայում Ասանժին մեղադրում են սեռական բնույթի հանցագործության մեջ: WikiLeaks-ի հիմնադիրը հերքում է բոլոր մեղադրանքները եւ համարում է, որ դրանք քաղաքական հիմնավորում ունեն.: Ըստ նրա` Շվեդիայից իրեն կարող են տեղափոխել ԱՄՆ, ուր արդեն գործ կհարուցվի` կապված սկանդալային կայքի գործունեության հետ: