Շվեդիայի դատախազությունը դիմել է շրջանային դատարան՝ պահանջելով Ջուլիան Ասանժի հեռակա ձերբակալման հրամանագիր

Շվեդիայի Թագավորության  դատախազությունն այսօր`մայիսի 20-ին, դիմել է շրջանային դատարան՝ պահանջելով WikiLeaks-ի հիմնադիր Ջուլիան Ասանժի հեռակա ձերբակալման հրամանագիր: Այս մասին տեղեկանում ենք գերատեսչության մամուլի հաղորդագրությունից:

Նշվում է, որ գլխավոր դատախազի տեղակալ Եվա-Մարի Պերսոնն այսօր հարցում է ուղարկել Ուպսալայի շրջանային դատարան` խնդրելով հեռակա կարգով ձերբակալել Ջուլիան Ասանժին:

Հաղորդագրությունում մասնավորապես նշված է. «Ես հայցում եմ, որ շրջանային դատարանը հեռակա կարգով ձերբակալի Ջուլիան Ասանժին՝ բռնաբարության կասկածանքով: Եթե դատարանը նրան ձերբակալելու մասին որոշում կայացնի, ապա  ես ձեռնամուխ կլինեմ նրա ձերբակալման եվրոպական օրդեր տալու ընթացակարգին, որով խնդրելուենք նրան արտահանձնել Շվեդիային»,- մանրամասնել է դատախազը:

Դատախազությունը նշում է նաև, որ, ըստ բրիտանական իշխանությունների կողմից տրամադրված տեղեկատվության, Ջուլիան Ասանժը 25 շաբաթով կալանքի տակ է վերցված Մեծ Բրիտանիայում գործած հանցագործության համար: Նրան հնարավոր է արտահանձնեն ԱՄՆ-ին:

Այնուամենայնիվ, Պերսոնի գնահատմամբ, «ձերբակալման շվեդական եվրոպական օրդերի և արտահանձնման վերաբերյալ ԱՄՆ-ի պահանջի միջև մրցակցության իրավիճակում Մեծ Բրիտանիայի իշխանությունները որոշում են ընդունում հերթականության կարգի մասին, այդ գործընթացի ելքը կանխատեսել հնարավոր չէ»: