Հունիսի 27-ից եթերը կմաքրվի "չռած մուսկուլներից" եւ "ապերոներից"

Հունիսի 27-ից գովազդների լեզուն կլինի բացառապես գրական հայերենը. այս մասին տեղեկացրեց լեզվի պետական տեսչության պետ Սերգո Երիցյանը:

ԵՐԿԻՐ-ի հարցին, թե արդյո՞ք օրենքը կազդի նաեւ մինչ այս նկարված գովազդների վրա, պարոն Երիցյանը պատասխանեց. «Միանշանակորեն»:

Նրա կարծիքով` այս օրերին օրենսդրական շատ կարեւոր փոփոխություններ եղան: Որպես օրինակ` նշեց նաեւ լեզվի մասին օրենքում կատարված փոփոխությունները, մասնավորապես` որոշ տերմինների պարզաբանումը:

«Լեզվական իրավունք, լեզվական պարտականություն, գործավարություն, պետական վերահսկողության ենթակա փաստաթուղթ, լեզվավիճակ... Այս եւ մի շարք տերմինների հստակ սահմանումը տրվեց: Սրանք տերմիններ էին, որոնք դժվարություններ էին առաջացնում»,- պարզաբանեց Երիցյանը:

Նրա խոսքով` դրական տեղաշարժ է նաեւ վարչաիրավական խախտումների ժամանակ կիրառվող տուգանքների չափի ավելացումը: Սակայն ամեն ինչ դեռ կատարյալ չէ, օրենքներում կան բացթողումներ:

«Օրինակ` մարդը կարող է իր ապրանքանիշը գրանցել օտար լեզվով, եւ ոչ հայերենով էլ ցուցանակ դնել ու արդարանալ` ասելով, որ դա ապրանքանիշն է, ոչ թե ցուցանակ»,- ասաց Ս. Երիցյանը: