Բնակչությունը դրական կարծիք ունի երկխոսության վերաբերյալ

Խորհրդարանական ընտրություններից նույնիսկ երեք ամիս առաջ հարցում անցկացնելն անիմաստ է, քանի որ դեռ այնպիսի իրադարձություններ կլինեն, որոնք լուրջ փոփոխություններ կմտցնեն թե' քաղաքական իրավիճակում, թե' բնակչության մոտեցումներում, հնարավոր է` նոր կուսակցություններ ի հայտ գան. այսօր լրագրողների հետ հանդիպման ժամանակ ասաց Հայկական սոցիոլոգիական ասոցիացիայի նախագահ Գեւորգ Պողոսյանը:

Ըստ նրա, սակայն, իրենք նախնական, ֆոնային ուսումնասիրություն են իրականացրել, որը ոչ այնքան հանրության, որքան լրագրողների, կուսակցությունների, գիտնականների համար է: Այն ներառում է միայն Երեւանի տվյալները, որտեղ բնակվում է Հայաստանի ամենաքաղաքականացված զանգվածը:

«Հարցումների համաձայն` իշխանություն-Կոնգրես երկխոսության կապակցությամբ բնակչության կարծիքը, ընդհանուր առմամբ, դրական է. հարցվածների 47 տոկոսը շատ դրական է գնահատել երկխոսության գնալը, 20 տոկոսը բացասական է գնահատել, իսկ մյուսները դժվարացել են պատասխանել կամ անտարբեր են եղել»,- ասաց Գ. Պողոսյանը:

Սոցիոլոգի խոսքերով` հարցվածների 37,4 տոկոսը նշել է, որ իշխանության վարկանիշը կբարձրանա, եթե երկխոսություն կայանա, 23,6 տոկոսն էլ այն կարծիքին է, որ արմատական ընդդիմության վարկանիշը կբարձրանա, եթե երկխոսությունը կայանա: Այսինքն, մարդկանց կարծիքով, իշխանություններն ավելի շատ կշահեն երկխոսության կայացումից, քան ընդդիմությունը:

Հարցին` եթե ընտրություններն առաջիկա օրերին անցկացվեին, ո՞ւմ կտային իրենց ձայնը, հարցման մասնակիցները պատասխանել են` ՀՀԿ` 27 տոկոս, «Բարգավաճ Հայաստան»` 18 տոկոսով, ՀԱԿ` 7,7, ՀՅԴ` 7,4 տոկոս: «Միանշանակ ՀՀԿ-ն եւ ԲՀԿ առաջին էշելոնում են, երկրորդում` Դաշնակցությունը եւ ՀԱԿ-ը, որոնց հաջորդում են «Ժառանգություն» եւ «Օրինաց երկիր» կուսակցությունները»,- ասաց սոցիոլոգը: