Այման ազ Զավահիրին "Ալ Քաիդա"-ի նոր առաջնորդն է

«Ալ Քաիդա» միջազգային ահաբեկչական կազմակերպությունն իր համար նոր առաջնորդ է ընտրել` Այման ազ Զավահիրիին. տեղեկացնում է Reuters գործակալությունը` վկայակոչելով արաբական ԶԼՄ-ներ:

Վերլուծաբանները կանխատեսում էին, որ հենց նա էլ փոխարինելու է մայիսի 2-ին ամերիկյան ուժերի կողմից ոչնչացված Ուսամա բեն Լադենին, սակայն «Ալ Քաիդա»-ի օպերատիվ շտաբի ղեկավարի պարտականությունները ժամանակավորապես դրվեցին եգիպտացի Սեյֆ ալ Ադլի վրա:

Ըստ արաբական աղբյուրների` ազ Զավահիրիի թեկնածությանն ընդդիմացել են կազմակերպության որոշ ներկայացուցիչներ, որոնք նախընտրում են, որ կազմակերպության ղեկավարությունն անցնի երիտասարդ սերնդի ձեռքը:

Մասնագիտությամբ բժիշկ ազ Զավահիրին «Եգիպտական իսլամական ջիհադ» կազմակերպության հիմնադիրն է: ԱՄՆ-ը նրան մեղադրում է երկրի տարածքից դուրս իր քաղաքացիներին սպանելու, ամերիկյան պետական հաստատությունների վրա հարձակումների մեջ: Նա 1998 թվականից հետախուզման մեջ է` Դար էս Սալամում (Տանզանիա) եւ Նայրոբիում (Քենիա) ԱՄՆ դեսպանատների վրա հարձակումների հետ կապված, որոնց հետեւանքով զոհվել է ավելի քան 200 մարդ: Ահաբեկչին ձերբակալելու հնարավորություն տվող ցանկացած տեղեկատվության համար Հետաքննությունների դաշնային բյուրոն պատրաստ է վճարել 25 մլն դոլար: