Մուրա՜դ, Սերո՜բ, ոսկի ա, ոսկի

Այս տարի «Ոսկե ծիրան» երեւանյան միջազգային կինոփառատոնին մասնակցելու հայտերը ռեկորդային թիվ են կազմել:

Փառատոնի գեղարվեստական ղեկավար Միքայել Ստամբոլցյանը նշեց, որ այս տարի ռեկորդային է նաեւ հայտ ներկայացնող երկրների թիվը:

«Ընտրություն անելը բավական դժվար էր: Այս տարի փառատոնը ստացել է 630 հայտ 81 երկրից, որոնցից ընտրվել են 150-ը` շուրջ 45 երկրներից»,- ասաց նա:

Կինոփառատոնն անցկացվելու է հուլիսի 10-17-ը: Աս տարի ներկայացվելու է 4 մրցութային ծրագիր` խաղարկային, վավերագրական ֆիլմերի, «Հայկական համայնապատկեր», ինչպես նաեւ նոր` «Կորիզ» կարճամետրաժ ֆիլմերի:

Փառատոնի միջազգային կապերի պատասխանատու Տաթեւիկ Հովհաննիսյանը տեղեկացրեց, որ փառատոնը կբացի աշխարհահռչակ ռեժիսոր Աբաս Քիա Ռոսթամիի` 2010թ. Կաննի փառատոնի մրցանակակիր «Վավերացված պատճեն» ֆիլմը:

Ստամբոլցյանը նշեց, որ դեռ անցած տարի էին ուզում ֆիլմը «բերել», սակայն ռեժիսորը չի կարողացել գալ:

«Գլխավոր դերակատարուհի Ժյուլեթ Բինոշը փառատոնին ներկա չի լինի. արտիստներն այս շրջանում բավականին զբաղված են»,- ասաց նա:

Փառատոնի կազմակերպիչները, նկատի ունենալով մասնագետների եւ հանդիսատեսի մեծ հետաքրքրությունը ԱՊՀ երկրներում արտադրված ֆիլմերի նկատմամբ, ԱՊՀ-ի ստեղծման 20-ամյակին նվիրված` «ԱՊՀ երկրների կինոն» խորագրով կցուցադրեն ֆիլմեր Տաջիկստանից, Ուկրաինայից, Ռուսաստանից...

Ծրագիրը կբացի Ալեքսեյ Ուչիտելի` «Օսկար»-ի նոմինանտ «Եզերք» ֆիլմը:

Կինոփառատոնի փոխտնօրեն Արա Խանջյանը նշեց, որ փառատոնին մասնակից ֆիլմերի մոտ 90 տոկոսը վավերագրական են, սակայն ցավով ավելացրեց, որ փորձը ցույց է տվել, որ հենց վավերագրական ֆիլմերի ցուցադրության ժամանակ դահլիճները կիսադատարկ են լինում: Իսկ ինչ վերաբերում է ֆիլմերի թեմատիկային, ապա Խանջյանի հավաստմամբ, այս տարի փորձել են մի քիչ զերծ մնալ քաղաքական թեմաներից եւ ուշադրությունը սեւեռել են մարդու ճակատագրի վրա:

Փառատոնը կփակի Վիմ Վինդերսի «Պինա» ֆիլմը, որը կցուցադրվի 3D ձեւաչափով:

Նշենք նաեւ, որ հունիսի 20-ից կլինեն նաեւ փառատոնին մասնակից ֆիլմերի նախնական ցուցադրություններ: