Պուտինը հավաքագրում է բանտարկյալներին ու անտուններին

Պուտինի ստեղծած «Ժողովրդական ճակատ»-ին կարող են անդամակցել նաեւ մասնավոր անձինք: ՌԴ կառավարության ղեկավարի կայքում երեկ հատուկ բաժին է բացվել, որի այցելուները ցանկության դեպքում կարող են հատուկ հարցաթերթիկ լրացել` անձնական տվյալներ, այդ թվում` սոցիալական կարգավիճակը նշելով. տեղեկացնում է «Էխո Ռոսիի» ռադիոկայանը:

Բլոգերներն ուշադրություն են դարձրել այն հանգամանքին, որ «Ժողովրդական ճակատ»-ին, մասնավորապես, կարող են անդամակցել նաեւ բանտարկյալներն ու անտունները` բոմժերը. հարցաթերթիկում նշված են նաեւ նման կատեգորիաները:

Ինչպես նշել է ՌԴ վարչապետի մամուլի քարտուղար Դմիտրի Պեսկովը, դրա նպատակն այն է, որ հստակորեն պարզվի, թե հասարակության որ խավերն են կիսում «ճակատի» տեսակետները: Ընդ որում` այն քաղաքացիները, ովքեր ինտերնետ չունեն, կարող են «ճակատային» դառնալ` դիմելով Պուտինի` իրենց տարածաշրջաններում գործող հասարակական ընդունարաններ: Ի դեպ, անդամության տոմսեր չեն լինելու: