Ճնշում են

Վաղը ռուսաց լեզու եւ քիմիա առարկաների քննություններով կմեկնարկի 2011 միասնական քննաշրջանը:

Գնահատման եւ թեստավորման կենտրոնի (ԳԹԿ) մամուլի ծառայության պատասխանատու Գայանե Մանուկյանը ԵՐԿԻՐ-ի հետ զրույցում նշեց, որ կենտրոնը ստացել է ռուսաց լեզու քննության մասնակցության 81 դիմում, իսկ քիմիա առարկայի համար` 102:

Նա հիշեցրեց, որ վաղը` մինչեւ ժամը 18:00-ն, դիմորդները պետք է ներկայանան բարձրագույն ուսումնական հաստատությունների ընդունող հանձնաժողովներ եւ կատարեն իրենց մասնագիտական հայտագրումը:

Քննությունների անցկացման համար յուրաքանչյուր մարզում ձեւավորվել են մեկական քննակենտրոններ, ԳԹԿ ներկայացուցիչները լինելու են բոլոր քննակենտրոններում:

Նշենք, որ այս տարի թեստերի տպագրությունն իրականացվել է բացառապես ԳԹԿ-ում, եւ թեստերի որեւէ արտահոսք, բարեբախտաբար, չի նկատվել:

«Եթե անցյալ տարվա 9-րդ դասարանի թեստերի արտահոսքը հասարակությունն արդարացիորեն դատապարտեց եւ մի ամբողջ տարի շահարկեց այդ թեման, այս օրերին նույն այդ հասարակությունը ջանասիրաբար ճնշումներ է իրականացնում ԳԹԿ աշխատակիցների վրա, որպեսզի ապօրինաբար ձեռք բերի այդ թեստերը»,- նշեց Գ. Մանուկյանը:

Ի դեպ, ըստ նրա` ճնշողների մեջ կան թե՛ տնօրեններ, թե՛ կրթության ոլորտի աշխատակիցներ, թե՛ ծնողներ եւ թե՛ ուսուցիչներ: