Նախագահը հերքո՞ւմ է կառավարությանը

ԱԺ ավանդական ճեպազրույցների ժամանակ ՀՅԴ խմբակցության պատգամավոր Արծվիկ Մինասյանը, անդրադառնալով կառավարությանն ուղարկված հարցապնդմանը եւ ՀՅԴ-ի առաջ քաշած` կառավարության հրաժարականի հարցին, նշեց, որ իրենք շարունակելու են հետամուտ լինել կառավարության ձախողումներին:

«Ցավոք, քաղաքական մեծամասնությունը չհաստատեց, բայց, ինչպես հասկացանք, շատ էլ դեմ չէին»,- ասաց նա` ավելացնելով, որ իրենք շարունակելու են պայքարը, քանի որ համոզված են` աշնանն ունենալու ենք շատ ավելի վատ վիճակ, քան այսօր է:

Պատգամավորի պնդմամբ`  հարցն օրակարգից, ըստ էության, դուրս չի եկել: «Պատահական չէ, որ երեկ հանրապետության նախագահը, անդրադառնալով նույն ժամանակահատվածի տնտեսական զարգացումներին, որոնք կառավարությունը գնահատել էր բացասական, փորձեց սրբագրումներ իրականացնել։ Նախագահը փորձում էր հերքել կառավարության պատասխանները»:

Դաշնակցական պատգամավորը նաեւ կարեւորեց Ընտրական նոր օրենսգրքի համար ՀՅԴ խմբակցության մղած պայքարը` ցավով արձանագրելով, որ քաղաքական մեծամասնությունը  գնաց իր նախընտրած ճանապարհով եւ ընդունեց այն, ինչ իրեն էր ձեռնտու:

Խմբակցության քարտուղար Արտաշես Շահբազյանը հիշեցրեց, որ իրենց պահանջներից միայն մեկը կատարվեց, այն էլ` մասնակի, եւ դա բավարար չէր, որ իրենք կողմ քվեարկեին դրան:

Արծվիկ Մինասյանի համոզմամբ` համաներման ակտը քաղաքական ակցիա էր` զուգորդված իրավական տարրերով: Նա հիշեցրեց, որ իրենց խմբակցությունը դեռեւս երկու տարի առաջ էր ասում, որ ավելի լայնածավալ համաներում է պետք:

«Եթե այսօր մեր քրեակատարողական հիմնարկներում ավելի շատ մարդիկ կան, քան նախատեսվում է, նշանակում է ինչ-որ բան մեր արդարադատության համակարգի հետ այն չէ»,- եզրակացրեց պատգամավորը: