Ադրբեջանի նախագահը և Թուրքիայի խորհրդարանի նախագահը քննարկել են Արցախյան հարցը

Թուրքիայի Ազգային մեծ ժողովի նորընտիր նախագահ, իշխող «Արդարություն և զարգացում» կուսակցության անդամ Մուսթաֆա Շենթոփը, որն այս օրերին գտնվում է  Ադրբեջանում, հանդիպել է երկրի նախագահ Իլհամ Ալիևի հետ։ Հանդիպման ժամանակ քննարկվել է Արցախյան հարցը, նաև` թուրք-ադրբեջանական համագործակցության առանցքային հարցերը. հաղորդում է ermenihaber.am կայքը:

Թուրք պաշտոնյան  հիշեցրել է, որ Թուրքիան Ղարաբաղի հարցում մշտապես սատարել է Ադրբեջանին:

Հանդիպման ընթացքում նա նաև կարևորել է այն էներգետիկ և գազային խոշոր նախագծերը, որոնք իրականացվում են երկու երկրների միջև։

Մինչ Ալիևի հետ հանդիպելը` Թուրքիայի խորհրդարանի նաախագահը հանդիպել էր Ադրբեջանի խորհրդարանի նախագահ Օքթայ Ասադովի հետ։ Հանդիպման ընթացքում Շենթոփը կարևորել է ադրբեջանական իշխանությունների պայքարը Թուրքիայում ահաբեկչական համարվող գյուլենական համայնքի ներկայացուցիչների դեմ։