Սիրիական ընդդիմությունը համընդհանուր գործադուլի կոչ է անում

Սիրիական ընդդիմությունը կոչ է անում այսօր երկրում համընդհանուր գործադուլ անցկացնել` ուսումնական հաստատություններում, խանութներում, հասարակական վայրերում, ամենուր: Իրենց կոչը ընդդիմադիրները տեղադրել են Facebook-ի «Սիրիական հեղափոխություն 2011» էջում. տեղեկացնում է France24 հեռուստաալիքը:

Սիրիայի իշխանությունները բանակի միջոցով ճնշում են զանգվածային անկարգությունները, որոնք երկրում սկսվել են մարտ ամսից: Պետության արեւմուտքում գտնվող Թալքալլահ քաղաքը դարձել է հերթական բնակավայրը, որում զինվորական ստորաբաժանումները զրահատեխնիկայի միջոցով դուրս են եկել ցուցարարների դեմ:

Իրավապաշտպանների տեղեկություններով` 27 ցուցարար է զոհվել:

Սիրիայի կառավարությունը մեղադրում է ահաբեկչական խմբավորումներին երկրում ապստամբություն հրահրելու մեջ:

Երեկ ԱՄՆ պետքարտուղար Հիլարի Քլինթոնը եւ ԵՄ արտաքին գործերի գերագույն հանձնակատար Քեթրին Էշթոնը հայտարարել են, որ մոտ ժամանակներս ԱՄՆ-ը եւ ԵՄ-ն նոր պատժամիջոցներ են կիրառելու երկրի ղեկավարության նկատմամբ: