Ադրբեջանական ընդդիմությունը կոչ է անում պատժամիջոցներ կիրառել Ադրբեջանի իշխանությունների դեմ

«Ադրբեջանի ժողովրդական ճակատ» կուսակցությունը կոչ է անում միջազգային ժողովրդավարական հանրությանը պատժիչ միջոցներ ձեռնարկել Ադրբեջանի ավտորիտար ռեժիմի դեմ։

«Իլհամ Ալիևի ռեժիմը համառորեն ցանկանում է Ադրբեջանը վերածել այնպիսի երկրի, ինչպիսին Հյուսիսային Կորեան է, և միջազգային հանրությունը պարտավոր է կանխել դա»,- ասվում է երկրի ընդդիմադիր կուսակցության հայտարարության մեջ։

Փաստաթուղթն ընդունվել է անկախ արհմիությունների նկատմամբ բռնաճնշումների վերջին փաստերի կապակցությամբ։ Մասնավորապես, անկախ Արհմիությունների Համադաշնության անդամների առնչությամբ։

«Պատճառն այն է, որ նրանք պաշտպանում են մոպեդներով պատվերներ առաքող առաքիչների ոտնահարված իրավունքները։ Օգոստոսի 1-ին մի խումբ առաքիչներ առարկեցին, որ ճանապարհային ոստիկանները կանգնեցնում են իրենց մոպեդները և տեղափոխում տուգանային հրապարակ։ Այս բողոքից անմիջապես հետո խորհրդի նախագահ Աֆիյադդին Մամեդովը դատապարտվել է 30-օրյա վարչական կալանքի։ Հետագա օրերին ձերբակալվել են նաև Արհմիությունների անկախ Համադաշնության խորհրդի անդամներ Այխան Իսրաֆիլովը և Էլվին Մուստաֆաևը՝ թմրանյութեր ձեռք բերելու, պահելու և վաճառելու մեղադրանքով։

Ընդդիմությունը կարծում է, որ ձերբակալված ակտիվիստներին առաջադրված մեղադրանքները կեղծ են և պնդում են, որ այդ անձինք թիրախ են դարձել իրենց հասարակական գործունեության պատճառով:

«Իլհամ Ալիևի ռեժիմը, որը հայտնի է իր կոշտ ավտորիտարիզմով և ռեպրեսիվ սովորություններով, մեծ սպառնալիք է համարում ցանկացած կազմակերպություն և բողոքի ցույց, որոնք չեն գտնվում իր վերահսկողության տակ։ Արհմիությունների անկախ կոնֆեդերացիան, որը պաշտպանում է աշխատողների, մասնավորապես՝ առաքիչների իրավունքները, դարձել է հետապնդման առարկա»,- ասվում է փաստաթղթում։

Բացի այդ, կուսակցությունը պահանջել է դադարեցնել երկրում ընդդիմադիրների և անկախ հասարակական-քաղաքական ուժերի նկատմամբ թշնամական վերաբերմունքը։ Վերջին ամիսներին մեծ թվով քաղաքական ու հասարակական գործիչներ, ինչպես նաև հավատացյալներ ձերբակալվել են քաղաքական դրդապատճառներով, այդ թվում՝ աշխարհահռչակ պրոֆեսոր և քաղաքական գործիչ Գուբադ Իբադօղլուն։

Ներկայումս բանտերում կա «Ժողովրդական ճակատ»-ի 8 ակտիվիստ։