Սիրիական ընդդիմությունը հետաձգում է նոր կառավարության ձեւավորումը

Սիրիայի ժամանակավոր կառավարության ընտրությունները, որոնք նախատեսված էին մարտի 12-ին, հետաձգվում են: Դրանք տեղի կունենան մարտի 20-ին. տեղեկացնում է Reuters գործակալությունը` վկայակոչելով անանուն աղբյուր:

Գործակալության զրուցակիցը նշել է, որ հենց այդ օրը քվեարկության անցկացման երաշխիքներ չկան:

Մինչդեռ Սիրիական ազգային կոալիցիայի անդամ Քամալ ալ Լաբվանին հայտարարել է, որ ընդդիմադիրները չեն կարողանում համաձայնության գալ կառավարության ձեւավորման հարցում: «Մենք չենք կարող այլեւս մեզ պառակտում թույլ տալ այդ հարցում: Հեղափոխությունը պետք է կազմակերպված լինի»,- ասել է նա:

Ընդդիմադիրների կարծիքները չեն համընկնում հարցում, թե կոնկրետ երբ պետք է ձեւավորել գործադիր մարմինը: Մի մասը համարում է, որ հարկ է սպասել անցումային շրջանի ավարտին, մյուս մասը արագ ձեւավորման կողմնակից է: Վարչապետի պաշտոնի հավանական թեկնածուն տնտեսագետ Օսամա ալ Քադին է` Սիրիայի հետպատերազմական վերականգնման ծրագրերի մշակման պատասխանատուն: