ՀԱԿ-ն ու իշխանությունը առեւտուր են անում

ՀՅԴ-ն նույնպես վերապահումներ է ունեցել` Մարտի 1-ի իրադարձությունների բացահայտման հետ կապված, եւ այդ հարցով ԱԺ ժամանակավոր հանձնաժողովի ներկայացրած եզրակացությանը հատուկ կարծիք է կցել: Այսօր խորհրդարանական ճեպազրույցների ժամանակ այդ մասին հիշեցրեց ՀՅԴ խմբակցության քարտուղար Արտաշես Շահբազյանը` մեկնաբանելով Հայաստանի երկրորդ նախագահ Ռոբերտ Քոչարյանի` վերջերս տված հարցազրույցում Մարտի 1-ի դեպքերին վերաբերող տեսակետը:

«Կարող եմ այն մասով համաձայնել, որ նախաքննությունն ամբողջապես չկարողացավ խնդիրը քննարկել և շատ հետևողական չեղավ»,- ասաց նա:

Անդրադառնալով ՀԱԿ-իշխանություն համագործակցությանը` խմբակցության քարտուղարն այն որպես առեւտուր որակեց:

Նրա համոզմամբ` Լեւոն Տեր-Պետրոսյանի առջեւ խնդիր է դրված` լուծել 10 զոհերի հարցը, ազատ արձակել բանտարկված ընկերներին եւ տեղեր ունենալ խորհրդարանում: Սերժ Սարգսյանի համար էլ ձեռնտու է երկխոսությունը, քանի որ գալիք ընտրությունների շեմին մթնոլորտը կմաքրվի եւ կվերանան նախորդ ընտրությունների` դեռեւս չմարսված հետեւանքները:

Արտաշես Շահբազյանը հույս հայտնեց, որ համագործակցությունն այդքանով կսահմանափակվի, եւ այլ կարեւոր խնդիրների, օրինակ` հայ-թուրքական հարաբերությունների վրա չի ազդի: