Արքայազն Հարրին` ջիհադական կազմակերպությունների նշանակետում

Մեծ Բրիտանիայի արքայազն Հարրին դարձել է ջիհադական կազմակերպությունների նշանակետը:

Ինչպես գրում է Daily Mail թերթը, ծայրահեղական կայքերից մեկում հայտնվել է «Նացիստ Հարրին» 3 րոպե տեւողությամբ տեսաժապավենը: Դրանում արքայազնը պատկերված է Աֆղանստանում 2007-2008 թթ. ծառայության ժամանակ: Նա հայտարարում է, որ իր «բոլոր ցանկություններն իրականություն են դարձել», որ ինքը «մագնիս է գնդակների համար», նաեւ ստորացուցիչ արտահայտություններ է անում պակիստանցիների ու արաբների հասցեին:

YouTube-ում զետեղվելով` տեսաժապավենն անմիջապես բազմաթիվ` ատելությամբ լի մեկնաբանություններ է ստացել, օրինակ` «Թող Ալլահը նրան անիծի ու ոչնչացնի», «Թող դժոխքի բաժին դառնա» եւ այլն: Որոշ մեկնաբանություններում էլ նշվում է, թե Հարրի եւ Հիտլեր անունները սկսվում են նույն տառով, հետեւաբար Հարրին «բրիտանական թագավորական նացիստ» է:

Երկյուղներ կան, որ իսլամական կազմակերպությունները կփորձեն վրեժ լուծել արքայազնից Ուսամա բեն Լադենի սպանության համար: