Բաշար ալ Ասադի նկատմամբ պատժամիջոցներ դեռ չեն կիրառվում

Եվրամիությունում չեն բացառում, որ Սիրիայի նախագահ Բաշար ալ Ասադի դեմ պատժամիջոցներ կարող են կիրառվել. Քաթարի մայրաքաղաք Դոհայում այսօր անցկացվող միջազգային համաժողովում հայտարարել է Շվեդիայի արտգործնախարար Կարլ Բիլդտը. տեղեկացնում է ԻՏԱՌ-ՏԱՍՍ-ը:

Նրա խոսքերով` ԵՄ-ն դեռեւս ելնում է «հաջորդաբար գործելու անհրաժեշտությունից»` կախված արաբական այդ երկրում իրադարձությունների զարգացումից: «Տվյալ պահին որոշում է կայացվել Սիրիայի նախագահին չընդգրկել այն սիրիացի բարձրաստիճան պաշտոնյաների ցուցակում, որոնց նկատմամբ ԵՄ արտգործնախարարները պատժամիջոցների փաթեթ են սահմանել: Սակայն հաջորդ ցուցակում կարող է հայտնվել նաեւ նախագահը: Գուցե նույնիսկ ուշացել ենք այդ որոշումը կայացնել, հուսով եմ` ոչ»,- հայտարարել է Բիլդտը:

Ուրբաթ օրը ԵՄ արտգործնախարարները սկզբունքային համաձանության են եկել Սիրիայի 14 պաշտոնյաների նկատմամբ պատժամիջոցներ կիրառելու հարցում: Դրանք, մասնավորապես, ենթադրում են Եվրամիություն մուտքի արգելք եւ բանկային հաշիվների սառեցում:

Մինչդեռ Պորտուգալիայի արտգործնախարարը, որը նույնպես մասնակցում է հավաժողովին, այսօր ավելի զուսպ է եղել Եվրամիության գործողությունները գնահատելիս: Ընդհանուր առմամբ, հավանություն տալով Սիրիայի նկատմամբ պատժամիջոցներին` Լուիշ Ամադուն, սակայն, կարծիք է հայտնել, որ ԵՄ-ն պետք է մշակի «արաբական աշխարհի հետ հարաբերությունների զարգացման երկարաժամկետ ռազմավարություն, այլ ոչ թե արձագանքի որեւէ կոնկրետ ճգնաժամային վիճակի, լինի` Եգիպտոսը, Լիբիան, թե Սիրիան»: