ԱՄՆ-ը պատժամիջոցներ է սահմանել Բաշար Ասադի որդու դեմ

Պաշտոնական Վաշինգտոնը նոր պատժամիջոցներ է սահմանել Դամասկոսի դեմ՝ «նպատակ հետապնդելով հասնել Սիրիայում իրադրության տևական քաղաքական կարգավորման». այս մասին Սպիտակ տանը կայացած ճեպազրույցի ժամանակ ասել է ԱՄՆ նախագահի մամուլի քարտուղար Քեյլի Մակինանին, նշելով՝ պատժամիջոցային ցուցակը համալրվել է 10 ընկերություններով և ֆիզիկական 4 անձանցով, այդ թվում՝ նախագահ Բաշար Ասադի որդին՝ Հաֆեզը։ 

Ըստ մամուլի խոսնակի՝ սահմանափակումներն ուղղված չեն սիրիացի ժողովրդի դեմ. «Կհաջորդեն նոր պատժամիջոցներ, որոնք կլինեն տնտեսական և քաղաքական ճնշման մշտական արշավի մաս՝ ուղղված Ասադի ռեժիմի համար ռեսուրսների հասանելիությունը սահմանափակելուն, որոնք նա օգտագործում է սիրիացի ժողովրդի դեմ պատերազմի համար»,- մանրամասնել է Մակինանին։