Ֆրանսիայի նախագահն ընդունել է հայ համայնքի պատվիրակությանը

Ֆրանսիայի նախագահ Նիկոլա Սարկոզին անցյալ շաբաթվա վերջին ընդունել է հայ համայնքի ներկայացուցիչներին եւ խոստացել է չխոչընդոտել  Հայոց ցեղասպանության ժխտումը քրեականացնող օրինագծի վավերացմանը ու չկաշկանդել իր համակիր սենատորների գործողությունները: Ընդհակառակը` նա մեկ  անգամ եւս հստակեցրել է,  որ ինքը մերժում է ցեղապաշտությունը`  ընդգծելով,  որ «ժխտողականությունը հավասարազոր է ցեղապաշտությանը»։

Ավելի քան մեկուկես ժամ տեւած հանդիպմանը մասնակցել են ՀՅԴ ներկայացուցիչ եւ CCAF-ի համանախագահ Մուրադ Փափազյանը, CCAF-ի համանախագահ Արա Թորանյանը,  Շառլ Ազնավուրի ներկայացուցիչ Լեւոն Սայանը, ներկա են եղել նաեւ Պատրիկ Դեւեջյանը եւ Ժան Սարկոզին։

Վաղը` մայիսի 4-ին, Ֆրանսիայի Սենատը քննարկելու  եւ քվեարկության է դնելու Հայոց ցեղասպանության ժխտումը քրեականացնող օրինագիծը, որը երկրի Ազգային ժողովը վավերացրել էր 2006-ի  հոկտեմբերի 12-ին:

Ըստ Ֆրանսիայի Հայ Դատի գրասենյակի տնօրեն Հրաչ Վարժապետյանի` հակառակ Թուրքիայի բացահայտ  ճնշումներին` հայ համայնքը միացյալ  ուժերով շարունակում է պայքարել Սենատում օրինագծի վավերացման համար` առաջին հերթին հանուն արդարության եւ մարդկության արժանապատվության:

Հայ Դատի տնօրենի խոսքերով` հայ համայնքի ներկայացուցիչները` որպես Ֆրանսիայի լիիրավ քաղաքացիներ, իրավունք ունեն պահանջներ դնելու իրենց ներկայացուցիչների առջեւ, մինչդեռ  «թուրքական պետական միջամտությունն անընդունելի է եւ ընկալվում է որպես մի պետության կողմից այլ ինքնիշխան պետության ներքին գործերին միջամտություն»: