Գնաճը պայմանավորված է արտաքին գործոններով

Ամենամեծ աճը մարտին արձանագրել է արդյունաբերությունը: Տնտեսության մեջ հետաքրքիր տեղաշարժեր են նկատվում` ի նպաստ արդյունաբերության. այսօր լրագրողներին հայտնեց ԱԺ ՀՀԿ խմբակցության պատգամավոր, ԱԺ ֆինանսավարկային բյուջետային հարցերի մշտական հանձնաժողովի նախագահ Գագիկ Մինասյանը եւ հավելեց, որ դա պայմանավորված է պետական քաղաքականությամբ:

«Արդյունքները բավականին դրական են` անցած մարտ ամսվա համեմատ ունենք 5,9% աճ»,- հայտարարեց նա:

Պատգամավորը շեշտը դրեց  արտահանման և ներմուծման  բնագավառում կատարված դրական տեղաշարժերի վրա` նշելով, որ այսօր արտահանումը կազմում է 12%, իսկ ներկրումը` 22%:

Անդրադառնալով ամենաարդիական խնդրին` գնաճին, բանախոսն ասաց. «Բարձր գնաճը` 11.5%,  պայմանավորված է նաև արտաքին գործոններով: Արտաքին շուկայում պարենային ապրանքների գներն աճել են: Պետք է քայլեր ձեռնարկել, որպեսզի մեր տնտեսությունը կախված չլինի արտաքին ճնշումներից: Այս ուղղությամբ աշխատանքներ են տարվում գյուղատնտեսության բնագավառում, և ըստ այդմ` ներքին արտադրության ոլորտում ակնկալվում է 10 % տնտեսական աճ»:

Գ.Մինասյանը նաեւ նշեց, որ եթե գիտությունն ավելի սերտ համագործակցի տնտեսության հետ, ապա դրա արդյունքում կշահի և' գիտությունը,  և' տնտեսությունը: