Թբիլիսիի հայկական թատրոնը կվերանորոգվի

Ապրիլի 21-ին լուծվել է Թբիլիսի Պետրոս Ադամյանի անվան հայկական դրամատիկական թատրոնի շենքի վերանորոգման հարցը. «Երկիր»-ի հետ զրույցում հայտեց Վրաստանի խորհրդարանի պատգամավոր, նաեւ թատրոնի գեղարվեստական ղեկավար Արմեն Բայանդուրյանը:

«Վրաստանի կառավարությունը 2 միլիոն լարի (1մլն 215 հազար դոլար) հատկացրեց, որից հետո ես կապվեցի ՀՀ մշակույթի նախարարի հետ ու հայտնեցի այդ լուրը: Նա էլ զանգել է Վրաստանի մշակույթի նախարարին եւ հայտնել իր երախտագիտությունը: Գիտեք չէ՞, Հայաստանի նախարարն էլ է ասել որ ինչ-որ բանով կաջակցի»,- ասաց Ա. Բայանդուրյանը` հավելելով, որ այդ գումարով կլուծվեն թատրոնի շենքի հետ կապված բոլոր խնդիրները, իսկ շինարարությունը կսկսվի մոտ օրերս:

Թբիլիսի Պետրոս Ադամյանի անվան հայկական դրամատիկական թատրոնը չի գործում արդեն 1,5 տարի, ըստ պատգամավորի` 9 ամիս:

Հարցին, թե ինչո՞ւ 10 տարի առաջ վերանորոգված շենքն այսօր դարձյալ անմխիթար վիճակում է, Ա. Բայանդուրյանը հայտնեց. «Դե 10 տարի առաջ էր, իսկ հիմա ճաքեր են տվել շենքի պատերը: Վրաստանի սեյսմիկ կենտրոնը ուսումնասիրեց եւ հայտնեց, որ շենքը վտանգավոր է»:

Շենքի վթարային վիճակը պայմանավորված է հիմքի տակ կուտակված ջրերի առկայությամբ, եւ հարկավոր է ջրահեռացման համակարգ կառուցել: