Հետաքրքիր աշուն է սպասվում

Խորհրդարանական ընտրություններին կմասնակցեն նախընտրական դաշինքներ. այսօր լրագրողների հետ հանդիպման ժամանակ ասաց «Նոր ժամանակներ» կուսակցության ղեկավար Արամ Կարապետյանը:

Ըստ նրա` միտում կա, որ դաշինքում կմիավորվեն «Ժառանգությունը», Դաշնակցությունը, Ժողովրդական կուսակցությունը եւ այլ ուժեր:

Որեւէ դաշինքի միավորվելու խնդիր չունի «Նոր ժամանակները», քանի որ, Ա. Կարապետյանի խոսքերով, խորհրդարան անցնելու համար այս կուսակցությունն ունի բավարար ընտրազանգված, իսկ ընտրություններին մասնակցելու համար էլ մարդկային եւ ֆինանսական ռեսուրսներ:

Արամ Կարապետյանը հերքեց այն լուրը,  թե օրերս հանդիպել է «Ժառանգության» առաջնորդ Րաֆֆի Հովհաննիսյանի հետ եւ քննարկել քաղաքական նոր միավոր ստեղծելու հարցը: Նաեւ հավելեց, որ նման առաջարկներ եղել են տարբեր ուժերի կողմից, սակայն նման միավոր կստեղծվի՞, թե՞ ոչ, Ա. Կարապետյանը վստահ չէ:

Քաղաքական գործիչը նշեց նաեւ, որ առաջիկա ընտրությունները վերջինն են լինելու` հիմնված տարբեր քաղաքական ուժերի միմյանց հետ պայմանավորվածությունների վրա, նախագահական ընտրություններն ավելի բարդ են լինելու:  

Իսկ մինչ այդ, ըստ Արամ Կարապետյանի, հետաքրքիր աշուն է սպասվում: