Առեւտրականները "գրավեցին'' ԱԺ ամբիոնը (տեսանյութ)

Այսօր փողոցային առեւտրով զբաղվող առեւտրականները  ԱԺ տարածքային կառավարման եւ տեղական ինքնակառավարման հանձնաժողովի կազմակերպած հանրային լսումների ժամանակ բորբոքվեցին, որ հնարավորություն չունեցան իրենց հարցերն ուղղել Երեւանի փոխքաղաքապետ Կամո Արեյանին: «Բողոքի ակցիան» շարունակվեց այնքան ժամանակ,  մինչեւ նրանք կարողացան հասնել իրենց նպատակին եւ ԱԺ ամբիոնից ներկայացնել իրենց «դարդն ու ցավը»:

Հայտարարված ընդմիջումի ավարտից անմիջապես հետո ելույթ ունեցան առեւտրականների չորս ներկայացուցիչներ:

75-ամյա թոշակառու Լեւոն Ուրիխանյանը, ով 28 հազար դրամ թոշակ է ստանում, ասաց. «Մենք շուկայի բան չենք, մենք արդեն պոլուֆաբրիկատ ենք դառել: Մեր նման մարդիկ էսօր կան, վաղը չկան: Այ մարդ, հաց ենք ուզում, եթե կարող եք մեզ հաց տալ, մենք չենք ուզի փողոց դուրս գալ: Ինձ օրական հաց տվեք ու, եթե ես դուրս գամ, ասեք ամոթ քեզ»:

Հաջորդ ելույթ ունեցողը` տիկին Ալլան, գանգատվեց, որ 1500 դրամ պարտքի պատճառով արդեն երկու ամիս է լույս չունեն, իսկ տրանսպորտի գումար չունենալու պատճառով տղան ոտքով է համալսարան գնում, ուսման վարձն էլ չվճարելու համար որդին տարկետում է վերցրել: «Ոչ մեկը հեղափոխական, ընդդիմադիր չի դառնում, ժողովրդին դարձնում են ընդդիմադիր,- ասաց նա ու ավելացրեց:- Մի պանիր ունեինք, էդ էինք ուտում, էդ էլ դարձրիք հարուստի ուտելիք»:

Այն առեւտրականները, ովքեր չէին կարողացել ԱԺ շենք մտնել, հավաքվել ու «գործուղված» ընկերներին սպասում էին խորհրդարանի պարիսպներից դուրս:

Տեսանյութը կարող եք դիտել այստեղ: