Գանձ են փնտրում հայկական գերեզմանոցներում

Թուրք գանձ որոնողները բարբարոսաբար պղծում են հայկական գերեզմանատները:

Ինչպես տեղեկացնում է թուրքական Posta պարբերականը՝ «հայկական ոսկու» մասին լուրերը Թուրքիայի բոլոր տարածքներից Ռիզե նահանգի Չամլըհեմշին շրջանի Մուրադ գյուղ է բերել բազմաթիվ գանձ որոնողների։

Անցած տարի Մուրադ գյուղի մոտ ճանապարհի շինարարություն սկսվեց։ Շինաշխատանքների ընթացքում հայտնաբերվեցին բլուրներ, որոնք, ինչպես պարզվեց, հայկական գերեզմաններ են եղել:

«Խոսակցությունները, թե այդ շրջանում ապրող հայերը հեռանալուց առաջ իրենց գանձերը թաղել են գերեզմաններում, Մուրադ գյուղ է բերել գանձեր որոնողների հոծ խմբերի: Նրանք խորը փոսեր են փորել գյուղի ողջ տարածքում, ինչն առաջացրել է գյուղացիների դժգոհությունը»,- նշում է թերթը։