«Հորթերս կորել են, փնտրում եմ»… 3 օր է` փնտրում են 80-ամյա տատիկին. մանրամասներ

Տեղեկացրել էինք, որ Տավուշի մարզի Գանձաքար գյուղում 80-ամյա գյուղացի է կորել: Yerkir.am-ի հետ զրույցում Գանձաքարի գյուղապետ Շահեն Շահինյանը հայտնեց, որ կորել է 80-ամյա Սեդա Զաքարյանը: Ի դեպ, Գանձաքարը սահմանամերձ գյուղ չէ:

«Տղայի, հարսի հետ էր ապրում ու առողջական որևէ խնդիր չի ունեցել, այսինքն` հիշողության հետ կապված որևէ խնդիր չի ունեցել: Ինքը, ինչպես մեր գյուղացիներից շատերը, սարի գլխին անասուններ է պահել: Վերջին անգամ նրան տեսել են օգոստոսի 8-ին ինչ-որ բան փնտրելիս, ասել է, որ հորթերն են կորել, հորթերն է փնտրում: Դրանից հետո կորել է, ու արդեն մի քանի օր է` տեսնող չի եղել»,- ասաց Շահինյանը:

Նա նշեց նաև, որ այս պահին էլ որոնողական աշխատանքները շարունակվում են. ԱԻՆ աշխատակիցների հետ գյուղացիներն էլ` 100 հոգով, փնտրում են տատին: «Այսօր առավոտյան տատի հավաքած ուրցն ենք գտել` մի քարի տակ պահած»,- հայտնեց գյուղապետը: