ՀԵՏՔ. Կճոյանի զենքը չհրկիզվող պահարանում է

Հանրապետության տարբեր բնագավառներում մատուցած նշանակալի ծառայությունների համար Արարատյան հայրապետական թեմի առաջնորդ Նավասարդ (Սամվել) արքեպիսկոպոս Կճոյանը պարգեւատրվել է զենքով:

2008 թ. դեկտեմբերին, թերթի հարցմանն ի պատասխան, ՀՀ կառավարության աշխատակազմի ղեկավար Դավիթ Սարգսյանը տրամադրել է 2007 թ. ապրիլից մինչեւ 2008 թ. դեկտեմբերի 12-ը վարչապետից իբրեւ պարգեւ զենք ստացած անձանց ցուցակը, որոնց թվում է նաեւ Սամվել Կճոյանը:

Արարատյան հայրապետական թեմի մամլո դիվանից փորձեցինք պարզել, թե ինչ տեսակի զենք է նվեր ստացել Սրբազանը եւ ինչ նպատակներով է այն օգտագործում: Մամլո դիվանի պատասխանատու Էլզա Մանուկյանը սկզբում ժխտեց զենք նվեր ստանալու փաստը. «Ոչ մի զենք էլ նվեր չի ստացել»:

Երբ նրան ասացինք, որ մեր ձեռքի տակ համապատասխան փաստաթուղթ կա, Էլզա Մանուկյանը խնդրեց այն տրամադրել իրենց, ինչից հետո գրավոր պատասխանեց, որ «Սրբազանը պարգեւատրվել է ատրճանակով, որը պահվում է չհրկիզվող պահարանում»:

Մեր հարցին, թե ինչ ատրճանակ է նվեր ստացել թեմի առաջնորդը, Էլզա Մանուկլյանը հրաժարվեց պատասխանել:

Հիշեցնենք, որ Նավասարդ արքեպիսկոպոս Կճոյանը վերջերս մամուլի ուշադրության կենտրոնում է` թանկարժեք Bentley մակնիշի ավտոմեքենա նվեր ստանալու փաստը հայտնի դառնալուց հետո:

«Այսօր զենքը զիջում է իր դիրքերը խելքին, եւ Հայաստանը նույնպես կարիք ունի «վերազինման»,- անցյալ տարվա ապրիլին ԳԱԱ-ում ասել է Նավասարդ արքեպիսկոպոս Կճոյանը: