Իշխանության պատճառով ժողովուրդը հացադուլի մեջ է

Երեկ Ազգային ժողովի փոխնախագահ Սամվել Նիկոյանն անդրադարձել էր «Ժառանգություն» կուսակցության առաջնորդ Րաֆֆի Հովհաննիսյանի հացադուլին եւ ասել, թե նա այդպիսով հաճելին համատեղում է օգտակարի հետ:

Նրա այդ արտահայտության վերաբերյալ այսօր լրագրողների հետ հանդիպման ժամանակ ԱԺ «Ժառանգության» խմբակցության ղեկավար Ստյոպա Սաֆարյանն ասաց. «Ի գիտություն նմանների` ուզում եմ ասել, որ Րաֆֆի Հովհաննիսյանը հացադուլ է հայտարարել նաեւ Հայաստանի բոլոր սովածների համար` բոլոր կուշտերի անունից: Հաշվի առնելով, որ նրանց ստամոքսն ուղղակի անասելի մեծ կախվածություն ունի ոչ միայն ուտելիքից, այլեւ հարկատուների հաշվին պահվող հաստատություններին հատկացումներից, եւ քանի որ չի պատկերացնում` ինչ է դա, հրավիրում ենք նրան հացադուլի վայր`փորձել գեթ մեկ օր անցկացնել այդ ցրտի եւ անմարդկային պայմաններում»:

Ս. Սաֆարյանը նշեց նաեւ, որ հենց իշխանության վարած քաղաքականության արդյունքում է հասարակությունը հացադուլի մատնվել: Եվ ցավալի է, որ բախտի քմահաճույքով բարձր պաշտոններում հայտնվել են մարդիկ, ովքեր անթույլատրելին համատեղում են օգտակարի հետ: