Կառավարությունը կմիջամտի

Հաց, աղ, ձու, կաթ, պանիր, կարագ... Եթե մեկ ամսվա ընթացքում առաջին անհրաժեշտության այս եւ մի շարք այլ ապրանքների գներն աճեն 30 եւ ավելի տոկոսով, կառավարությունը կմիջամտի եւ կսահմանի դրանց վերին շեմը, ասել է թե` կսահմանափակի գների հետագա բարձրացումը:

Որոշման նախագիծն այսօր արժանացավ գործադիրի հավանությանը:

«Միջազգային պրակտիկայում ընդունված է պետության ուղղակի միջամտությունը գների կարգավորման դաշտում, եթե դրա անհրաժեշտությունն առաջանում է, որպեսզի աժիոտաժային միջավայրը հարթվի եւ շուկան վերադառնա իր բնականոն վիճակին»,- ասաց վարչապետ Տիգրան Սարգսյանը:

Նա նաեւ տեղեկացրեց, որ հիշյալ գործիքը կառավարությունը կարող է կիրառել ոչ ավելի, քան 90 օր, որից հետո նորից կվերադառնա բնական գնագոյացման ռեժիմը: «Մենք գտնվում ենք բարձր գնաճային փուլում, եւ պետությունը պետք է ունենա ամբողջական գործիքակազմ` գնաճը զսպելու համար»,- հավելեց վարչապետը: