ԱՄՆ-ը հայտարարել է, որ Ռուսաստանի հետ պատերազմի դեպքում կմիջամտի Ուկրաինայի կողմից

Ուկրաինայի պաշտպանության նախարարությունը հայտարարել է, որ ԱՄՆ ռազմական գերատեսչությունից երաշխիքներ է ստացել Ռուսաստանի հետ ռազմական բախման դեպքում աջակցության վերաբերյալ: Այս հայտարարությունը, որի մասին հինգշաբթի հաղորդել է ուկրաինական գերատեսչության մամուլի ծառայությունը, արվել է Ուկրաինայի և Միացյալ Նահանգների պաշտպանության նախարարներ Անդրեյ Տարանի և Լլոյդ Օսթինի հեռախոսազրույցում. հաղորդում է ՏԱՍՍ-ը:

Նշվում է, որ սա վերջին մեկուկես ամսվա ընթացքում Տարանի և Օսթինի երկրորդ խոսակցությունն է և տեղի է ունեցել ամերիկյան կողմի նախաձեռնությամբ:

Ուկրաինայի պաշտպանության նախարարը զրուցակցին տեղեկացրել է Դոնբասում՝ ռազմական գործողությունների գոտում, տիրող իրավիճակի մասին: Բացի այդ՝ նրանք քննարկել են «անվտանգության և պաշտպանության ոլորտում համագործակցության ընդլայնման հատուկ ուղղությունները»: