Թուրքիայում առաջարկել են Պաղեստինի նկատմամբ կիրառել «լիբիական մոդելը»

«Մավի Վաթան» («Կապույտ հայրենիք») ծովային դոկտրինի հիմնադիր, պաշտոնաթող թուրք փոխծովակալ Ջիհաթ Յայջին առաջարկել է Պաղեստինի հետ կնքել ծովային սահմանների սահմանազատման մասին նույնպիսի ծովային համաձայնագիր, ինչպիսին ստորագրվել էր Լիբիայի հետ ավելի վաղ: Պայմանագիրն ուղղված կլինի Գազայի հատվածի ծովային շրջափակումը դադարեցնելուն. հայտնում է Yeni Şafak-ը։

«Այս համաձայնագիրը կբարձրացնի Պաղեստինի միջազգային ճանաչումը և իրական քաղաքական աջակցությունը: Իսրայելական գործոնը խոչընդոտ չէ համաձայնագրի կնքմանը: Քանի որ Պաղեստինը կարող է լինել Արևելյան միջերկրածովյան ֆորումի անդամ, դա նշանակում է, որ այն կարող է նաև կնքել ծովային համաձայնագրեր»,- ասել է թոշակառու փոխծովակալը:

Նշենք, որ «Մավի Վաթանը» իրենից ենթադրում է Թուրքիայի ծովային սահմանների սահմանագծում։ Այս ծավալապաշտական ծրագիրը բազմիցս խախտել է Թուրքիայի հարևանների, մասնավորապես՝ Հունաստանի և Կիպրոսի ծովային սահմանները։ Դրա շնորհիվ Թուրքիան 2019 թ. նոյեմբերին Լիբիայի ազգային համաձայնության կառավարության հետ (Լիբիայի ընդամենը մի մասը վերահսկող) կնքել է ծովային համաձայնագիր՝ արհեստականորեն ծովային սահման ունենալով Լիբիայի հետ։