Ինտերնետ ծառայությունների սակագները նվազում են

ԼՂՀ հանրային ծառայությունները եւ տնտեսական մրցակցությունը կարգավորող պետական հանձնաժողովի այսօրվա նիստում հայտարարվել է Ղարաբաղում ինտերնետ հասանելիության նոր՝ նվազեցված սակագների մասին։ Խոսքը «Ղարաբաղ Տելեկոմ» ՓԲԸ-ի կողմից ինտերնետ ծառայությունների մատուցման մասին է։

Մարտի 5-ից կգործեն նոր սակագներ, որոնք գործող սակագներից ցածր են 53 տոկոսով։ Ռադիոմոդեմ կապով ինտերնետ բաժանորդներին անվճար տրամադրվող թրաֆիկի չափը նույնպես փոփոխության է ենթարկվում՝ գործող 256 Մբ-ից դառնալով 512Մբ, իսկ այն լրանալուց հետո, յուրաքանչյուր 1Մբ-ի արժեքը կկազմի 5 դրամ՝ գործող 9 դրամի փոխարեն։

Անվճար թրաֆիկի քանակն ավելանալու է եւ լրացուցիչ թրաֆիկի օգտագործման սակագները նվազելու են նաեւ DSL մոդեմով սահմանափակ մուտքով ինտերնետ կապի բաժանորդների համար գործող «Լայթ» եւ «Հեւի» փաթեթային սակագնային պլանների ներսում։ Սակագները կնվազեն 48-57 տոկոսով։

Հարցի քննարկման ժամանակ հանձնաժողովի նախագահ Հակոբ Ղահրամանյանը հայտարարեց, որ ինտերնետ ծառայությունների սակագների նվազեցումը վերջնական չէ. հարցին կանդրադառնան նաեւ ապրիլին։