Գազի ու էլեկտրաէներգիայի սակագները կրկին կբարձրանան. «Հայկական ժամանակ»

«Հայկական ժամանակ» թերթը գրում է. «Արժույթի միջազգային հիմնադրամը ՀՀ կառավարությանն առաջարկել է բարձրացնել ամենակարիքավոր ընտանիքներին տրամադրվող նպաստի չափը: ԱՄՀ առաջարկը պայմանավորված է էլեկտրաէներգիայի եւ գազի սակագների հնարավոր բարձրացմամբ: Այս մասին հայտարարել է Հայաստանում Արժույթի միջազգային հիմնադրամի առաքելության ղեկավար Մարկ Հորթոնը: Վերջինս չկոնկրետացրեց, թե որքան են բարձրանալու սակագները, սակայն նշեց, որ իր տեղեկություններով՝ սակագների փոփոխությունները կարող են տեղի ունենալ ամռան ամիսներին: Հորթոնը հայտնեց, որ իրենք տեղեկություններ ունեն ՀՀ կառավարության եւ ռուսական «Գազպրոմի» միջեւ տեղի ունեցող բանակցությունների մասին, որոնց նպատակը Հայաստանին մատակարարվող գազի գնի իջեցումն է: Թե ինչ արդյունքներ են տալիս այդ քննարկումները, ԱՄՀ-ն տեղեկացված չէ:

Այս կառույցը նաեւ չի հաշվարկել, թե գազի եւ էլէներգիայի սակագների բարձրացումը կոնկրետ ինչպիսի ազդեցություն կթողնի ընդհանուր գնաճի վրա, սակայն Մարկ Հարթոնի կարծիքով՝ գնաճի ցուցանիշը առաջիկայում ավելի բարձր կլինի, քան նախատեսված է բյուջեով»: