Ձերբակալման պատճառներն անհիմն են

«Մենք լավ հասկանում ենք, որ անձին ազատությունից զրկելը նախաքննության փուլում կոտրելու, ճնշելու միջոց է: Սա արդեն մեզ մոտ, ցավոք, սովորություն է դարձել»,- ասաց ընդամենը ժամեր առաջ ձերբակալված Տիգրան Փոստանջյանի փաստաբան Հայկ Ալումյանը:

Հարցին, թե ո՞րն է ձերբակալության պատճառը, Հ. Ալումյանը պատասխանեց, թե նախաքննություն իրականացնող մարմինը համարում է, որ Տ. Փոստանջյանը, գտնվելով ազատության մեջ, հնարավոր է թաքնվի  քննությունից կամ անօրինական  ազդեցություն գործադրի «տուժողների» նկատմամբ:

«Նախապես ասեմ, որ նման ենթադրությունների հիմքերն առհասարակ բացակայում են` նկատի ունենալով, որ դեռ ուրբաթ օրվանից իմ պաշտպանյալը գիտեր, որ իր նկատմամբ հարուցված է քրեական  գործ եւ, ինչպես տեսնում եք, ոչ միայն փախուստի փորձ չի արել, այլեւ երկու անգամ` երեկ եւ այսօր, բարեխղճորեն ներկայացել է քննությանը: Այսինքն` նման մտավախությունները բացարձակ անհիմն են»,- ասաց Հ. Ալումյանը:

Դեռեւս հարց է, թե ինչո՞ւ է նախաքննությամբ զբաղվում Ազգային անվտանգության ծառայությունը: Հ. Ալումյանը նշեց, որ պարզվում է` ԱԱԾ-ում ներկայումս քննվում են անգամ խուլիգանության առիթով հարուցված գործեր. «Այսօր մեր ԱԱԾ-ն վերածվել է այնպիսի մի մարմնի, որտեղ կարող է ցանկացած գործ քննվել, եւ անբացատրելի է մնում, թե ինչու»:

Կոնկրետ այս գործի դեպքում,  ըստ Հ. Ալումյանի, պարզել են, որ գլխավոր  դատախազն անձամբ է ցուցում տվել, որ գործը քննվի ԱԱԾ-ի կողմից: Իսկ թե այդ ցուցումն ինչո՞վ է հիմնավորված, անհայտ է:

Փաստաբանը նշեց, որ սովորաբար ԱԱԾ-ի կողմից կալանավորման վերաբերյալ դատարան ներկայացված միջնորդությունները չեն  մերժվում: Նա կարծում է, որ եթե նախաքննական մարմինը ԱԱԾ-ն չլիներ, ապա հավանականությունն ավելի մեծ կլիներ, որ դատարանն ընդուներ` իր պաշտպանյալը  քննությունից թաքնվելու փորձ չի արել:

Փաստաբանը նշեց, որ իր 14-ամյա պրակտիկայի ընթացքում երբեք չի հանդիպել այնպիսի մի դեպքի, որ միակողմանի ցուցմունքի հիման վրա`երկու կողմին չլսելով, քրեական գործ հարուցվի. «Տարբերվում է նրանով,  որ գլխավոր դատախազության պետական շահերի պաշտպանության  վարչությունը, ինչ-որ քաղաքացուց ստանալով հաղորդում, թե իմ պաշտպանյալը իրենից ապօրինաբար վարձատրություն է  ստացել, հարուցում է քրեական գործ անմիջապես` իմ պաշտպանյալին գոնե մեկ անգամ չառաջարկելով ներկայացնել իր տեսակետը»:

Հիշեցնենք, որ Տիգրան Փոստանջյանը մեղադրվում է ապօրինի վարձատրություն վերցնելու մեջ` համաձայն ՀՀ Քրեական օրենսգրքի 311¹-րդ հոդվածի: