Քաղաքական ազատ մրցակցություն չի լինի

Կոալիցիայի հայտարարությունը ընդգծում է իշխանության արհամարհանքը ժողովրդավարության, ընտրությունների ինստիտուտի եւ հասարակության կամքի հանդեպ: Իշխող կոալիցիայի ստորագրած հայտարարության մասին ասել է «Սիվիլիթաս» հիմնադրամի տնօրեն,  Հայաստանի նախկին  արտգործնախարար Վարդան Օսկանյանը:

«Կոալիցիոն ուժերը բաց տեքստով հայտարարում են, որ գալիք խորհրդարանական ընտրություններում չեն պատրաստվում իրականացնել քաղաքական ուժերի հիմնական առաքելությունը` քաղաքական ազատ մրցակցության մեջ մտնել միմյանց հետ: Ավելին`  նաեւ հայտարարում են, որ նպատակ ունեն  առանց այդ էլ խորհրդարանում չնչին ներկայություն ունեցող ընդդիմությանը լիովին դուրս մղել խորհրդարանից»,- ասված է Վարդան Օսկանյանի տարածած հայտարարությունում:

Ըստ նրա` կոալիցիոն նոր հուշագիրը ոչ միայն չի նպաստի երկրում ստեղծված բարդ սոցիալական, տնտեսական եւ քաղաքական իրավիճակի բարելավմանը, այլեւ ավելի կբարդացնի այն: «Իրավիճակից դուրս գալու ճանապարհը ոչ թե այդ իրավիճակի բարելավման հիմնական խոչընդոտը հանդիսացող իշխանությունների վերարտադության երաշխավորումը պետք է լիներ, այլ իշխանության ներսում հակակշռի ապահովումը` միահեծան իշխանությանը այլընտրանքի հնարավորության հեռանկարը»,- ասել է Օսկանյանը: