ԿԱՊԻՏԱԼ. Թուրքական ողջ մեդիան անցավ Էրդողանի ձեռքը

Թուրքիայի Ազգային մեծ ժողովը վավերացրել է «Ռադիոյի, հեռուստատեսության և հեռարձակման մասին» օրինագիծը, և այն ուժի մեջ է մտել։ Այս մասին հաղորդում է թուրքական Anadolu գործակալությունը։

Ըստ նոր օրենքի՝ Թուրքիայի վարչապետը կամ հետագայում այդ լիազորություններով օժտվելիք նախարարը կարող են ժամանակավորապես կասեցնել ցանկացած լրատվամիջոցի գործունեությունը, եթե այն բացահայտորեն ուղղված է Թուրքիայի ազգային անվտանգության դեմ և կարող է հանգեցնել հասարակարգի խարխլմանը։

Լրատվամիջոցի գործունեության դադարեցման մասին որոշումը կարող է բողոքարկվել Պետական խորհրդում (Բարձրագույն վճռաբեկ ատյան), որը պետք է որոշում կայացնի 48 ժամվա ընթացքում։

Ըստ նոր օրենքի՝ լրատվամիջոցն իր գործունեությամբ չպետք է հակասի Թուրքիայի գոյությանն ու անկախությանը, ազգի ու պետության տարածքային ամբողջականությանը, Մուստաֆա Քեմալ Աթաթուրքի սկզբունքներին, հանրության շրջանում չպետք է հրահրի կրոնական, ազգային, լեզվական, սեռական, դասակարգային ատելություն և թշնամանք, չպետք է գովաբանի ու խրախուսի ահաբեկչությունը։